'රජ කඹ' ගිල දැමූ පසු අමාරුව කාටද?

හිටපු පොලිස්පති පූජිත් ජයසුන්දර සහ හිටපු ආරක්ෂක අමාත්‍යාංශයේ ලේකම් හේමසිරි ප්‍රනාන්දු යන දෙදෙනාට මරණ දණ්ඩනය නියම වී අවසන්ය. 

ත්‍රිපුද්ගල මහාධිකරණ විනිසුරු මඩුල්ලක් විසින් මෙම මරණ දඬුවම නියම කරනු ලැබුවේ ඊයේ (31) ය. 2019 පාස්කු ඉරිදා ත්‍රස්ත ප්‍රහාරය වැළැක්වීමට අපොහොසත් වීම, රාජකාරි පැහැර හැරීම සහ අපරාධකාරී සැලකිල්ල ඔවුන්ට එරෙහිව නැඟුණු චෝදනා ගොන්නට ඇතුළත් ය. ඔවුන් වරදකරුවන් බවට තීන්දු විය. 

මරණ දඬුවම නියම කිරීමේ දී අධිකරණය සැලකිල්ලට ගත් ප්‍රධාන කරුණු කිහිපයක් තිබිණ.

මෙම ප්‍රහාරයට පෙර බුද්ධි තොරතුරු ලැබී තිබීම ඉන් එක් කරුණකි. ඉන්දියානු බුද්ධි අංශ ඇතුළු මූලාශ්‍රවලින් ප්‍රහාරයක් පිළිබඳ අනතුරු ඇඟවීම් කල්තියා ලැබී තිබූ බව අධිකරණය සලකා බැලීය.

රාජකාරි වගකීම් ඉටු නොකිරීම සලකා බැලූ තවත් කරුණක් ය. බුද්ධි අංශ තොරතුරු ලැබුණු පසු ආරක්ෂක අංශ සම්බන්ධීකරණය කිරීම, පල්ලි සහ අනෙකුත් ඉලක්ක ආරක්ෂා කිරීම, සැකකරුවන් අත්අඩංගුවට ගැනීම වැනි අවශ්‍ය පියවර නිසි ලෙස නොගත් බවට අධිකරණය තීරණය කළේය.

එම අතපසුවීම හේතුවෙන්, 2019 අප්‍රේල් 21 වන දින පුද්ගලයන් 260කට අධික පිරිසක් මිය ගොස්, පන්සිය ගණනක් තුවාල ලැබූ බවත්, එය බරපතළ ප්‍රතිවිපාකයක් බවත් අධිකරණය සැලකිල්ලට ගත්තේය.

අධිකරණය මෙම අතපසුවීම සාමාන්‍ය පරිපාලන වරදක් නොව, අපරාධ නීතිය යටතේ අපරාධමය වගකීමක් ලෙස සහ බරපතළ රාජකාරි පැහැර හැරීමක් ලෙස සලකා බැලීය.

පාස්කු ප්‍රහාරය සම්බන්ධයෙන්

2021 ජනාධිපති විමර්ශන කොමිෂන් සභාව, හිටපු ජනාධිපති මෛත්‍රීපාල සිරිසේන ද ඇතුළත්ව නිලධාරීන් කිහිප දෙනෙකුට එරෙහිව අපරාධ ක්‍රියාමාර්ග ගැනීම සලකා බලන ලෙස නිර්දේශ කර තිබුණි. 

2023 ජනවාරි 12 දින ශ්‍රී ලංකා ශ්‍රේෂ්ඨාධිකරණය ලබාදුන් මූලික අයිතිවාසිකම් තීන්දුව අනුව, පාස්කු ඉරිදා ප්‍රහාරය වැළැක්වීමට අසමත් වීම සම්බන්ධයෙන් හිටපු ජනාධිපති මෛත්‍රීපාල සිරිසේන ඇතුළු නිලධාරීන් කිහිප දෙනෙකු මූලික අයිතිවාසිකම් උල්ලංඝනය කළ බව තීරණය කළේය. 

ඒ අනුව මෛත්‍රීපාල සිරිසේන, රුපියල් මිලියන 100ක්, හිටපු පොලිස්පති පූජිත ජයසුන්දර රු. මිලියන 75ක්, හිටපු රාජ්‍ය බුද්ධි සේවා ප්‍රධානී නිලන්ත ජයවර්ධන

රු. මිලියන 75ක්, හිටපු ආරක්ෂක අමාත්‍යාංශ ලේකම් හේමසිරි ප්‍රනාන්දු

රු. මිලියන 50ක් සහ හිටපු ජාතික බුද්ධි ප්‍රධානී සිසිර මෙන්ඩිස් රු. මිලියන 10ක් වශයෙන් පුද්ගලික වන්දි ගෙවිය යුතු බවටත් නියෝග කළේය. 

මෙම තීන්දුවේදී ශ්‍රේෂ්ඨාධිකරණය සඳහන් කළේ, බුද්ධි තොරතුරු ලැබී තිබියදීත් ඒ අනුව ක්‍රියා නොකිරීම නිසා වින්දිතයන්ගේ ජීවිතයට සහ ආරක්ෂාවට අදාළ මූලික අයිතිවාසිකම් උල්ලංඝනය වූ බවය.

මෙය මූලික අයිතිවාසිකම් නඩුවක තීන්දුවක් මිස, එය අපරාධ නඩුවක් නොවීය. 

කතෝලික පල්ලිය සහ වින්දිතයන්ගේ පාර්ශ්වය දිගින් දිගටම ඉල්ලා සිටියේ මෛත්‍රීපාල සිරිසේන ඇතුළු පිරිසට එරෙහිව අපරාධ නඩු පවරන ලෙසය. 

ශ්‍රේෂ්ඨාධිකරණයේ (2023) මූලික අයිතිවාසිකම් නඩුවේදී, හිටපු රාජ්‍ය බුද්ධි සේවා ප්‍රධානී නිලන්ත ජයවර්ධනටද වගකීමක් ඇති බව ශ්‍රේෂ්ඨාධිකරණය තීරණය කළේය. රුපියල් මිලියන 75ක පුද්ගලික වන්දියක් ගෙවන ලෙස ඔහුටනියෝග කළේ ඒ අනුවය.

පූජිත ජයසුන්දර සහ හේමසිරි ප්‍රනාන්දුට එරෙහිව අපරාධ නඩුවක් ගොනු වුණු අතර, මේ වන විට ඔවුන් දෙදෙනාට මරණ දඬුවම නියම වී ඇත. 

මෛත්‍රීපාල සිරිසේන, මූලික අයිතිවාසිකම් නඩුවේ දී වගකිව යුතු බව තීරණය වූ නමුත් ඔහු අපරාධ නඩුවක විත්තිකරුවෙකු නොවීය. එසේම නිලන්ත ජයවර්ධන ද මූලික අයිතිවාසිකම් නඩුවේ දී වගකිව යුතු බව තීරණය වූ නමුත්, පූජිත සහ හේමසිරිට එරෙහි අපරාධ නඩුවේ දී ඔහු විත්තිකරුවෙකු නොවීය. මේ පිළිබඳව නීතිපති දෙපාර්තමේන්තුව විසින් සවිස්තරාත්මක නිල පැහැදිලි කිරීමක් මෙතෙක් ප්‍රසිද්ධ කර නැත.

ශ්‍රේෂ්ඨාධිකරණය මෛත්‍රීපාල සහ නිලන්ත වගකිව යුතු බව තීරණය කළා නම්, නීතිපතිවරයා ඔවුන්ට එරෙහිවද අපරාධ නඩු නොපැවරුවේ ඇයි? මේ සඳහා නිල වශයෙන් ප්‍රකාශිත සම්පූර්ණ හේතුවක් නොමැත. 

නීතිපතිවරයාගේ චෝදනා ගොනු කිරීමේ තීරණය, සාක්ෂි, අදාළ නීති සහ නඩු ගොනු කිරීමේ විචක්ෂණ බලය මත රඳා පවතියි. එහෙත් එම තීරණයට හේතු වූ විස්තරාත්මක නීතිමය කරුණු ප්‍රසිද්ධ කර නොමැති බැවින්, මොවුන්ට එරෙහිව අපරාධ නඩු පැවරීමක් නොකළේ ඇයි ද යන්නට නිශ්චිත හේතුවක් ලෙස කිසිවක් මේ දක්වා ප්‍රකාශ වී නොමැත.

මෙය නීතිපතිවරයාගේ චෝදනා ගොනු කිරීමේ තීරණය සහ තිබූ සාක්ෂි මත රඳා පවතින නීතිමය ක්‍රියාවලියක් වන අතර, එම තීරණයට හේතු වූ සම්පූර්ණ කරුණු මෙතෙක් නිල වශයෙන් ප්‍රකාශයට පත් කර නොමැත.

කෙසේ වෙතත්, 1976 සිට ශ්‍රී ලංකාවේ මරණ දඬුවම ක්‍රියාත්මක නොවන බැවින්, මෙම දඬුවම වහාම ක්‍රියාත්මක නොවේ. සාමාන්‍ය නීතිමය පටිපාටිය අනුව මෙම මරණ දඬුවම ජීවිතාන්තය දක්වා සිරදඬුවමක් බවට පත්වේ. තවද, මොවුන් දෙදෙනාටම, අභියාචනාධිකරණය සහ අවශ්‍ය නම් ශ්‍රේෂ්ඨාධිකරණය වෙත ගොස් මේ තීන්දුව සම්බන්ධයෙන් අභියාචනා කිරීමේ නීතිමය අයිතිය ද පවතී.

රජ ඇසුර, යම් කාලයකට බැබළී සිටීමට මඟක් වුවත්, 'රජ කඹ' ගිල දැමූ පසු ඇතිවන්නේ 'රජ වේදනාවක්' බවත් සියල්ලෝම වටහා ගැනීම යහපති.

රයිගම් කංකානම්ගේ අංජන✍️